Natao
ho Lalàna Mandrakizay Ireo Andro Firavoravoana Voatendrin"i Jehovah
Fihetsika manao ahoana no
tian’Andriamanitra hataontsika amin’ireo Fotoam-pivavahana notendreny ireo?
Izao no baiko fototra:
« Izao no fotoam-pivavahana
voatendrin'i Jehovah, dia fivoriana masina hantsoinareo amin'ny fotoany
avy » (Miverina in-3 ao amin’ny Lev 23).
Fotoana voatondro isan-taona ireo, ary
ivoriantsika miaraka amin’ireo mpiray fanantenana.
Tamin’ny andron’i Nehemia,
dia nila nampaherezina ny olona satria nanao tsinontsinona ny Fotoam-pivavahana
izy.
Ny boky
Nehemia 8 dia manambara ny fomba nitandreman’ny olon’Andriamanitra ny Fetin’ny
Trompetra. Tamin’ny fivoriam-bavaka nataon’izy ireo, ny mpitarika dia
nanampy ny olona hahazo tsara ny lalàna, araka izao hita izao:
(Neh 8:2, 7-8) « Dia nentin'i Ezra mpisorona ny lalàna tamin'ny andro
voalohany tamin'ny volana fahafito ho eo anatrehan'ny fiangonana, na lehilahy
na vehivavy, mbamin'izay rehetra efa mahahaino. »
(Neh 8:7) « Ary Jesoa sy Bany sy Serebia sy Jamina sy Akoba sy Sabetahy sy
Hodia sy Mahaseia sy Kelita sy Azaria sy Jozabada sy Hanana sy Pelaia ary ny
Levita dia nampianatra ny olona ny lalàna; ary ny olona dia teo amin'izay
nitoerany ihany. »
(Neh 8:8) « Dia novakiny mazava ny teny tao amin'ny bokin'ny
lalàn'Andriamanitra, sady nohazavainy tsara ny heviny, ka dia azon'ny olona
tsara ny teny novakina. »
« Ary Nehemia governora sy Ezra mpisorona, mpanora-dalàna, ary ny Levita izay
nampianatra ny olona dia nanao tamin'ny olona rehetra hoe: Masina ho an'i
Jehovah Andriamanitrareo ity andro ity; koa aza malahelo na mitomany. Fa
nitomany ny olona rehetra raha nandre ny tenin'ny lalàna. » (Neh 8:9)
« Dia hoy izy taminy: Mandehana, hano ny matavy, ary sotroy ny mamy, dia mba
anatero anjara izay tsy manan-javatra voavoatra; fa masina ho an'ny Tompontsika
ity andro ity; koa aza malahelo ianareo, fa ny fifaliana avy amin'i Jehovah no
fiarovana mafy ho anareo. » (Neh 8:10)
Tahaka
ny fanao isan-kerinandro amin’ny Sabata, Jehovah Andriamanitra dia nandidy
fotoam-pivavahana isak’ireo Andro Masina notendreny isan-taona ireo.
Ny
Mpamorona antsika dia tia izay olona mino Azy sy manaraka ny didiny rehetra
an-tsitrapo (Isa 66:2). Ny marina dia izao: na isika tena mino na tsy
mino an’Andriamanitra.
Ny apostoly Jaona dia nampahafantatra ny
toetra ankasitrahan’Andriamanitra raha nanoratra hoe:
« Fa izao no fitiavana
an'Andriamanitra, dia ny hitandremantsika ny didiny, sady tsy mavesatra ny
didiny. » (1 Jao 5:3)
Mitovy
ny fiaraha-miangona fanao amin’ny Sabata sy amin’ireo Fotoam-pivavahana
notendren’i Jehovah isan-taona
Nambaran’Andriamanitra tamin’ireo Kristiana
voalohany ny fitovian’izay atao amin’ny fiaraha-miangona fanao amin’ny Sabata
sy amin’ireo Fotoam-pivavahana notendreny isan-taona:
(Heb 10:23-25) « aoka
hohazonintsika mafy ny fanekena ny fanantenana mba tsy hihozongozonany (fa
mahatoky Ilay efa nanao ny teny fikasana); »
« ary aoka isika hifampandinika hampandroso ny fitiavana sy ny asa tsara; »
« aza mahafoy ny fiarahantsika miangona, tahaka ny fanaon'ny sasany, fa
mifananara kosa, mainka satria hitanareo fa mihantomotra ny andro. »
Fotoana tsara indrindra
hifampaherezana sy hifaporisihan’ny mpino ny Andro Firavoravoana satria manambara ny Planin’Andriamanitra ho famonjena ny
olombelona rehetra, sady Sabata lehibe izany! (Jao 19:31c).
Rehefa miombom-bavaka amin’ireo andro
fivoriana masina isan-taona ireo isika, dia manana fotoana hianarana
bebe kokoa momba ny Planin’Andriamanitra amin’ny famonjena.
Ny Fiangonana voalohany dia nanohy
nitandrina ireo andro fety isan-taona ireo araka izany fitsipika izany ihany,
saingy miampy fahalalana ny hevi-panahiny bebe kokoa (Asa 2; 1
Kor 5:6-8).
Nitory koa izy ny amin’ny Fanjakan’Andriamanitra sy
ny fanomezana ny Fanahy Masina ho an’ny olona izay mino.
Nampianariny koa ny famonjena sy
fanasitranana ary famahana olana ataon’i Jesosy Kristy Izay
efa any an-kavanan’ny Ray any an-danitra. Nohazavainy ny hevi-panahin’ireo
Fotoam-pivavahana voatendrin’i Jehovah, toy izao hita manaraka izao.
ü Ny nilatsahan'ny Fanahy Masina
tamin'ny Andro Pentekosta, sy ny tori-teny nataon'i Petera tamin'izany
« Ary nony
tonga ny Andro Pentekosta, dia teo amin'ny fitoerana iray izy rehetra. » (Asa
2:1)
« Ary nitsangana Petera sy ny iraika ambin'ny folo lahy, dia nanandra-peo izy
ka nanao taminy hoe: Ry lehilahy Jiosy sy izay rehetra monina eto Jerosalema,
aoka ho fantatrareo izao, ka henoy ny teniko: » (Asa 2:14)
« Fa izao ilay nampilazaina an'i Joela mpaminany hoe: » (Asa 2:16) « Amin'ny
andro farany, hoy Andriamanitra, no handatsahako ny Fanahiko amin'ny nofo
rehetra; Ary ny zanakalahinareo sy ny zanakavavinareo haminany, ary ny
zatovonareo hahita fahitana, ary ny lahiantitrareo hanonofy; »
(Asa 2:17) « Ary ny mpanompoko, na lahy na vavy, dia handatsahako ny Fanahiko
amin'izany andro izany, ka dia haminany izy; »
(Asa 2:18) « Izany Jesosy izany dia efa natsangan'Andriamanitra, ary
vavolombelon'izany izahay rehetra. » (Asa 2:32)
« Ary rehefa nasandratry ny tanana ankavanan'Andriamanitra* Izy, ary nandray
tamin'ny Ray ny Fanahy Masina Izay nokasainy, dia efa nampilatsaka izao
hitanareo sy renareo izao Izy. » (Asa 2:33)
« Koa aoka ho fantatry ny taranak'Israely rehetra marimarina fa iny Jesosy
nohomboanareo tamin'ny hazo fijaliana iny dia efa nataon'Andriamanitra ho Tompo
sy Kristy. » (Asa 2:36)
« Ary raha nandre izany ny olona, dia voatsindrona tam-pony ka nanao tamin'i
Petera sy ny Apostoly namany hoe: Ry rahalahy, inona no hataonay? » (Asa 2:37)
« Ary hoy Petera taminy: Mibebaha, ary aoka samy hatao batisa amin'ny anaran'i
Jesosy Kristy ianareo rehetra mba hahazo famelana ny helokareo; ary ianareo
handray ny fanomezana, dia ny Fanahy Masina; » (Asa 2:38)
ü Toriteny
nataon’i Paoly tamin’ny fety Fihinanana Mofo Tsy Misy msirasira
« Tsy mety
ny fireharehanareo. Tsy fantatrareo va fa ny masirasira kely dia mahazo ny
vongana rehetra? » (1 Kor 5:6)
« Esory ny masirasira ela, mba ho vongana vaovao ianareo, araka izay tsy
maha-misy masirasira anareo. Fa voavono Kristy, Paska ho antsika; » (1 Kor 5:7)
« ka dia aoka isika hanao andro firavoravoana, tsy amin'ny masirasira ela, na
amin'ny masirasira lolompo sy faharatsiana, fa amin'ny mofo tsy misy
masirasira, dia ny fahadiovam-po sy ny fahamarinana. » (1 Kor 5:8)
Ireo
andro vatokana ireo dia natao hifalian’ny fianakaviana rehetra—izay rehetra
manatrika! Tsindrina manokana ny amin’ny Fetin’ny Tabernakely, izay misy
fotoana betsaka ho an’ny fianakaviana tsirairay, sy fotoana hialam-boly; ao koa
firavoravoana noho ny fahalalana ara-panahy izay ampahafantarin’Andriamanitra.
Mba tena
hifaliana tsara amin’ny fankalazana ny Andro Firavoravoan’i Jehovah, dia tsy
tokony hanao ny asa fanao an-davanandro isika: mitsahatra toy ny fanao
amin’ny Sabata, andro fahafito (Lev 23:3, 7-8, 21, 25, 35-36).
Fanamarihana:
Mariho
fa na dia miteraka asa aza ny fikarakarana sakafo hohanina amin’ny andro
firavoravoana, dia ambaran’i Jehovah fa azo atao tsara izany. Nefa na izany aza, mandritra ny Andro Fanavotana, atsahatra
ny asa rehetra, ao anatin’izany ny fandrahoan-tsakafo, fa atao
mialoha izany (and 28, 30-31).
Maneho fankatoavana sy fanarahana ny
didin’Andriamanitra koa isika amin’ny fandaminam-potoana any amin’ny
toeram-piasana mba hahazoantsika mitandrina ny Andro Firavoravoana.
Rehefa alamina tsara sy dinihina amim-panajana
miaraka amin’ny mpampiasa ny fotoana dia afaka manatrika tsara ireo andro ireo
ny ankabeazan’ny mpino.
Andraikitsika ny mampiasa fahendrena sy
faharetana rehefa mampahafantatra ny ankohonana izay fanapahan-kevitsika
hitandrina ny andro firavoravoana.
Faharoa: Famintinana Ireo Andro
Firavoravoana Isan-Taona
Ny fanarahana
didin’Andriamanitra dia araka ny finoana. Hoy Paoly: « fa
finoana no andehanantsika, fa tsy fahitana; » (2 Kor 5:7)
Araka
izany dia zava-dehibe amintsika ny manomboka mitandrina ny Andro
Masin’Andriamanitra rehefa mianatra momba azy ireo. Na dia tsy
mbola mahazo ny zava-drehetra aza isika eo am-boalohany, dia hianatra zavatra
betsaka kokoa rehefa tena manomboka mitandrina azy.
Fotoam-pifaliana
ho an’ny zanak’Andriamanitra ny andro firavoravoana fanao isan-taona; tsy noho
ny heviny ihany, fa noho ny fanantenana entiny ho an’ny olon-drehetra.
Ny fitandremana ny Fotoam-pivavahana
voatendrin’i Jehovah dia mampahatsiaro antsika ny fitiavan-dehibe
omen’Andriamanitra ny olombelona.
Ny
fivavahana amin’ireo andro ireo dia fifaliana sy fahafinaretana. Tena
fanomezan’Andriamanitra ho an’ny olony marina tokoa ireo. Ny dingam-pamonjena
harahin’izay maniry ho voaloham-bokatra ara-panahy miditra ao amin’ny
Fanjakan’Andriamanitra dia hazavaina ao amin’ny Fetin’ny Paska hatramin’ny
Fetin’ny Tabernakely.
Ireo tsy
nanana anjara tamin’ny fitsanganana voalohany kosa dia amin’ny fitsanganana
faharoa vao hahafantatra ny Planin’ny Famonjena sy Jesosy Kristy Mpamonjy ary
Andriamanitra marina. Ireo izay mino sy mankatò dia hovonjena; fa izay tsy mino
sy mandà kosa dia holevonina mandrakizay any amin’ny farihy afo.
Famintinana ny hevitry ny Andro
Firavoravoana rehetra
Ny Paska dia
manamarika ny nahafatesan’i Kristy, ho famonjena antsika.
Ny Fetin’ny Mofo Tsy Misy Masirasira, manamarika ny fivoahantsika amin’ny ota.
Ny Pentekosta, manambara ny
fandraisantsika ny Fanahy Masina avy amin’Andriamanitra.
Ny Fetin’ny Trompetra, manambara ny
fivererenan’i Kristy hamonjy ny olombelona tsy ho fongotra noho ny ataony
ihany, ary koa handray ireo olo-masina, voaloham-bokatry ny Fanahy nomena
fiainana mandrakizay, ary hamerina ny Fanjakan’Andriamanitra eto an-tany.
Ny Andro Fanavotana, manambara izay
hitranga amin’i Satana sy ny devoly namany aorian’ny fiavian’i Kristy indray.
Ny Fetin’ny Tabernakely: manambara
ny Fanjakana arivo taona, fotoam-piadanana mahagaga manerana izao tontolo izao,
andro famelombelomana andrasana sady tanjona antenain’ny Kristiana.
Ny Andro Lehibe Farany :
Fitsanganana faharoa, fotoana zato taona ahazoana mianatra sy mahafantatra
tanteraka an’Andriamanitra marina sy mankatò ny lalàny.
✋Inona no hitranga aorian’ny Milenioma na
Fanjakana arivo taona?
Fitsanganana
faharoa, arahin’ny fahafatesana faharoa ho an’izay rehetra tsy
nibebaka mihitsy, sy fiainana mandrakizay ho an'izay rehetra mino, ary lanitra
vaovao sy ny tany vaovao.
Amin’izao
fotoana fanombohan’ny andro farany izao, dia mety amintsika ny miezaka hanana
toetra tsara mendrika ny fitsanganana voalohany mba ho isan’ny voaloham-bokatra ao
amin’ny Planin’Andriamanitra ho famonjena. Io
Planina io dia efa namboariny hatrany am-piandohana ary nomaniny ho
mandrakizay.
Fahatelo: Ahoana ny Amin’ny
Firavoravoan’ny Sabata?
Nahoana Andriamanitra no nandidy ny
fitandremana ny Sabata isan-kerinandro ho isan’ny didy folo? Ary nahoana io didy io no tsy ekena saika
manerana izao tontolo izao? Ny antony betsaka mahatonga ny olona tsy hitandrina
ny Sabata, dia noho ny tsy fahazoana sy tsy fampiharana ny Didy
Folon’Andriamanitra manao hoe:
“Mahatsiarova ny
andro Sabata hanamasina azy” (Eks 20:8).
Betsaka no mijery ny Sabata ho toy ny “zavatra
tonta mahafinaritra” teo amin’ny tantara, angamba fomba fijery
tamin’ny fotoana iray taloha, tsy mahazatra intsony amin’izao andro ankehitriny
feno fahasahiranana izao.
Misy
mino fa ny Alahady no Sabata; ary rehefa mandany ora iray na roa ao
am-piangonana dia mahafeno izay lazain’ny Didy Fahefatra. Ny sasany kosa mino
fa efa nofoanan’i Jesosy Kristy ny Sabata, ary nosoloina andro fitsaharana
manokana, araka izay fidin’ny tsirairay ho masina hanompoany
an’Andriamanitra. Betsaka no mino fa ny Apostoly Paoly na ny Fiangonana
voalohany dia nanova ny Sabata ho Alahady.
Fanontaniana:
Nahoana
anefa Andriamanitra no nandidy andro fitsaharana iray isan-kerinandro? Manana
tanjona amin’izany ve Izy? Raha eny, inona izany tanjona izany? Nahoana no
misy fifangaroana toy izany amin’ny didy iray ao amin’ireo Didy 10 fototra sy
lalàna nomen’Andriamanitra hitarihana ny olombelona? Nahoana no misy
fifanipahana mafy toy izany amin’ny didy iray, fa toa mifanaraka sy tsy
mifanditra kosa ny ankabeazan’ny olona, ao anatin’izany ny filoham-pivavahana
sy ny fiangonana tarihiny amin’ny Didy sivy hafa?
Mila
fantarina avokoa ny valin’ireo fanontaniana lehibe ireo.
Raha tianao, vakio ny boky momba ny Sabata,
izay azonao angatahana maimaimpoana aminay.
Fahefatra: Ny Farihy Afo na Helo sy ny Fahafatesana faharoa
Aorian’ny fitsarana farany no hisy ny fahafatesana
faharoa
Midika
izany fa aorian’ny fitsanganana faharoa no hitranga izany, izany hoe, aorian’ny
Fanjakana 1000 Taona.
« Fa ny osa sy ny tsy mino
sy ny vetaveta sy ny mpamono olona sy ny mpijangajanga sy ny mpanao ody ratsy
sy ny mpanompo sampy ary ny mpandainga rehetra dia hanana ny anjarany ao
anatin'ny farihy mirehitra afo sy solifara; izany no fahafatesana
faharoa. » (Apo 21:8)
« Ary ny ranomasina dia namoaka ny maty tao anatiny; ary ny
fahafatesana sy ny fiainan-tsi-hita* namoaka ny maty tao aminy; dia samy
notsaraina araka ny asany izy. [* Gr. Hadesy] » (Apo 20:13)
Fahafatesana mandrakizay ny fahafatesana
faharoa
Ny fahafatesana faharoa dia fahafatesana
mandrakizay, tsy misy fitsanganana intsony.
Olona nofo
aman-drà ireo dorana any ireo, ka holevon’ny afo!
Aorian’ny
Fanjakana Arivo Taona no hanadiovana ny tarehin’ny tany amin’ny afo. « Fa ho avy tahaka ny mpangalatra ny
andron'ny Tompo, ary amin'izany ny lanitra dia ho lasa amin'ny firimorimoana
mafy, ary ho levon'ny afo ny tenan'ny zavatra rehetra*, ka hodorana avokoa ny
tany sy ny asa izay eo aminy. [* Na: ny masoandro sy ny volana ary ny
kintana] » (2 Pet 3:10).
Ireo
fahavalon’i Kristy roalahy (Satana sy ny mpaminany sandoka) sy ireo olona tsy
nety nibebaka mihitsy dia hatsipy any amin’ny farihy afo amin’ny fiverenan’i
Kristy.
« Ary
nosamborina ilay bibi-dia mbamin'ny mpaminany sandoka, dia ilay nanao ny
famantarana teo anatrehany, izay nentiny namitaka ny efa nandray ny mariky ny
bibi-dia sady miankohoka eo anoloan'ny sariny; ary dia natsipy velona ho any
amin'ny farihy afo mirehitra solifara izy roroa. » (Apo 19:20) « Ary
raha nisy tsy hita voasoratra teo anatin'ny bokin'ny fiainana, dia natsipy tany
amin'ny farihy afo izy. » (Apo 20:15)
Ho
levon’ny afo toy ny lavenona ireo olona tsy nibebaka ireo
« Fa,
indro, avy ny andro, mandoro toy na fatana fandoroana izy; ary ny mpirehareha
rehetra sy ny mpanao ratsy rehetra dia ho vodivary; ka dia handoro azy ny andro
izay ho avy, hoy Jehovah, Tompon'ny maro, ka tsy hasiany miangana, na ny fakany
na ny sampany. » (Mal 3:19)
« Ary hiposaka aminareo, izay matahotra ny anarako, ny Masoandron'ny
fahamarinana, manana fanasitranana ao amin'ny tanany*; ary hivoaka ianareo ka
hifalihavanja toy ny zanak'omby mifahy; [Heb. elany] » (Mal 3:20)
« ary hohitsahinareo ny ratsy fanahy; fa ho lavenona eo ambanin'ny
faladianareo izay amin'ny andro izay hotendreko, hoy Jehovah, Tompon'ny
maro. » (Mal 3:21)
Hatsipy
any amin’ny farihy afo ny fahafatesana sy ny fiainan-tsi-hita
« Ary
ny fahafatesana sy ny fiainan-tsi-hita* dia natsipy tany amin'ny farihy afo.
Izany no fahafatesana faharoa, dia ny farihy afo. [*
Gr. Hadesy] » (Apo 20:14)
Izao no
hevitr’izany: Ireo olona tsy nibebaka fa nandà an’Andriamanitra ihany no olona
mety maty halefa ao anatin’io afo io mandritry ny fitsanganana faharoa. Noho
izany, dia hitsahatra tsy hisy intsony ny fahafatesana sy ny fiainan-tsi-hita
rehefa tapitra nirehitra ireo mety maty tsy nibebaka ireo!
Ahoana
ny amin’i Satana sy ny bibi-dia sy ny mpaminany sandoka?
« Ary
ny devoly izay namitaka azy dia natsipy tany amin'ny farihy afo sy solifara,
izay misy ilay bibi-dia sy ilay mpaminany sandoka koa, ary hampijalina andro
amin'alina mandrakizay mandrakizay ireo. » (Apo 20:10) Satana dia fanahy, ary tsy levon’ny afo na
mandre maharary sy mijaly amin’ny maha ao anaty afo azy. Fantatsika koa fa tsy hirehitra mandrakizay ny afo rehefa levona
izay olona sy “kitay” mampirehitra azy.
Ny fahoriam-panahy no hanjò an’i Satana mandrakizay satria tsy hahita olona
hofitahiny sy hampijaliany intsony, sady very maina ny ezaka nataony nandritry
ny taona arivony maro! Ny
bibi-dia sy ny mpaminany sandoka kosa dia tsy mijaly ao amin’ny afo mandrakizay
fa may sy levona mandakizay izy ireo.
Fahadimy : Ny Lanitra Vaovao sy ny Tany Vaovao
(1)
Inona no zavatra hitranga manaraka rehefa voadio tamin’ny afo ny Tany ?
Apo 21:1. « [Ny amin'i
Jerosalema vaovao] Ary nahita Lanitra Vaovao sy Tany Vaovao aho; fa efa
lasa ny lanitra voalohany sy ny tany voalohany, ary ny ranomasina dia tsy misy
intsony. »
Fanamarihana: Ny teny izay voasoratra ao
amin’ny Apo 21:1, dia milaza fa tsy mila ranomasina hanohana ny fiainana fizika
intsony ny Tany Vaovao sy ny Lanitra Vaovao. “Olona” araka ny fanahy ihany no
honina eto an-tany amin’izany fotoana izany.
(2) Amin’izany fotoana izany, hidina eto
an-tany va ny seza fiandrianan’Andriamanitra izay any amin’ny lanitra fahatelo
ankehitriny, ary honina eto an-tany va Andriamanitra Ray ?
Apo. 21: 2-3.
« Ary nahita aho fa, indro, ny tanàna
masina, dia Jerosalema vaovao, nidina avy any an-danitra tamin'Andriamanitra,
voaomana tahaka ny ampakarina efa mihaingo hihaona amin'ny vadiny. » (Apo
21:2)
« Ary nahare feo mahery avy teo amin'ny seza fiandrianana aho nanao hoe:
Indro, ny tabernakelin' Andriamanitra dia eo amin'ny olona, ary Izy hitoetra*
eo aminy, ary ireo ho olony, ary Andriamanitra no hitoetra eo aminy, dia ho
Andriamaniny. [* Gr. hitoetra an-day] » (Apo 21:3)
« Ary hofafany ny ranomaso rehetra
amin'ny masony; ary tsy hisy fahafatesana intsony, sady tsy hisy alahelo, na
fitarainana, na fanaintainana; fa efa lasa ny zavatra taloha. » (Apo
21:4)
« Ary hoy Ilay mipetraka eo ambonin'ny seza fiandrianana: Indro, havaoziko
ny zavatra rehetra. Ary
hoy koa Izy: Soraty; fa mahatoky sy marina ireo teny ireo. » (Apo 21:5)
(3) Voalaza any amin’ny toeran-kafa ao
amin’ny Baiboly ankoatry ny boky Apokalypsy koa va ny amin’ny Tany Vaovao sy ny
Lanitra Vaovao ? Isa. 65: 17-19; 66: 22; 2Pet 3: 13.
« Fa,
indro, Izaho mahary Lanitra Vaovao sy Tany Vaovao, ka dia tsy hotsarovana
intsony ny taloha, na ho mby ao an-tsaina akory aza. » (Isa 65:17) « Fa
mifalia kosa sy miravoravoa mandrakizay, satria mahary izany Aho; fa, indro,
mahary an'i Jerosalema ho fifaliana Aho ary ny olony ho firavoravoana. »
(Isa 65:18) « Dia ho faly amin'i Jerosalema Aho sy ho ravoravo
amin'ny oloko; ary ny feo mitomany tsy ho re any intsony, na ny feo
mitaraina. » (Isa 65:19) « Fa tahaka ny Lanitra Vaovao sy ny Tany
Vaovao, izay hataoko, no haharitra eo anatrehako, hoy Jehovah, dia toy izany ny
haharetan'ny taranakareo sy ny anaranareo. » (Isa 66:22)
« Kanefa
isika, araka ny teny fikasany, dia manantena Lanitra Vaovao sy Tany Vaovao,
izay itoeran'ny fahamarinana. » (2 Pet 3:13)
(4) Toy
inona no refin’ny Tanàna Masina, dia Jerosalema Vaovao izay midina avy any
an-danitra ? Apo. 21: 12-17.
« ary
manana mànda lehibe sady avo sy vavahady roa ambin'ny folo izy, ary eo amin'ny
vavahady dia misy anjely roa ambin'ny folo, ary misy anarana voasoratra eo, dia
ny an'ny firenena roa ambin'ny folo amin'ny Zanak'Isiraely; » (Apo 21:12) « eo
atsinanana vavahady telo; eo avaratra vavahady telo; eo atsimo vavahady telo;
eo andrefana vavahady telo. » (Apo 21:13) « Ary ny màndan'ny tanàna
dia misy fanorenana roa ambin'ny folo, ary misy anarana roa ambin'ny folo koa
eo, dia ny an'ny Apostoly roa ambin'ny folon'ny Zanak'ondry. » (Apo 21:14)
« Ary ilay niteny tamiko dia nanana fandrefesana volotara volamena handrefesany
ny tanàna sy ny vavahadiny ary ny màndany. » (Apo 21:15) « Ary ny
tanàna dia efa-joro, ka mitovy ny lavany sy ny sakany; ary nandrefy ny tanàna
tamin'ny volotara izy, ka roa arivo sy iray alina stadio. Mitovy ny
lavany sy ny sakany ary ny hahavony. » (Apo 21:16) « Ary nandrefy ny
màndany izy, ka efatra amby efa-polo amby zato hakiho, araka ny refin'ny olona,
dia ny an'ny anjely. » (Apo 21:17)
Fanamarihana:
Ny refin’ny lafiny iray dia 12000 stadio,
izany hoe 1500 maily na 2778 km (1 maily = 1852 m). Mihoatra ny halavan’i
Madasikara manelanelana ny tendrony roa antsimo sy avaratra ny lavany sy ny
sakany ary ny haavon’ny Tanàna.
Ny andininy faha 16 dia milaza fa mitovy ny halavany sy ny sakany ary ny
haavony, izany hoe toy ny kioba goavam-be io tanana io.
FAMINTINANA :
Araka ny fanampiana sy fitarihan’ny
Fanahin’Andriamanitra antsika amin’ny zavatra nataony ho masina sady miafina,
isika dia tokony hifantoka amin’ny lanitra vaovao sy ny tany vaovao izay
hotanterahin’Andriamanitra.
Izao no voasoratra:
« Isika no nanambaran'Andriamanitra izany tamin'ny Fanahy; fa ny Fanahy
mamantatra ny zavatra rehetra, na dia ny saina lalina izay an'Andriamanitra
aza. » (1 Kor 2:10) « Kanefa isika, araka ny teny fikasany, dia
manantena lanitra vaovao sy tany vaovao, izay itoeran'ny fahamarinana. »
(2 Pet 3:13)